慶祝13號~~

2002年2月13日後起計，今日係我同Baby一齊拍拖既第42個13日啦~ 即係3年半lu~ hehe好耐也.... :P

諗左好耐，終於決定到去葵芳食和民也。嘩... Baby已經連續3日行葵芳，死啦一陣有葵芳恐懼症喎。

最衰今日無帶影機啦，d野食個樣好靚架。我地先叫左《明太子年糕燒餅》、《蒜香蝦帶炒飯》同埋《蟹子蝦壽司》，慣常地我地簡左好耐先簡到哩3個炸，所以先落單先，然後再花一輪時間去簡兩杯野飲，我就簡到《Caramel Mike Tea》，Baby就係《Pina Colada》，Baby好多次黎和民都係飲佢架hehe。

食食下見到格離張枱黎左碟蟹腳，哈哈佢地係一男一女，個男既好似唔係太過熟手去對付d蟹腳也，好肉酸，好彩我無叫姐，如果我黎開蟹腳分分鐘成d腳向四面八方飛彈!!

我好乖架，有調節住自己食野既速度，等自己唔好食得太快 :P 不過有時都忍唔到停得太耐 :P 我發現Baby食野好似啜得耐d架，可能哩個係食得慢既方法，不過我都係唔知點解啜得唔耐既。可能係想快d食下一啖掛~ 哈哈~

本來以為個飯好多，不過都唔係既，我唔係好夠喎哈哈~ 我好大食嘛，所以就再叫多個《鐵板手捧餃子》，好滿足啦我。

最後叫多個令我地好開心既甜品，《朱古力軟芯蛋糕》!! 嘩d朱古力係中間流出黎架呵呵~~ 我同Baby一人一下咁細細啖細細啖咁食，雖然個蛋糕仔好細個，不過食左都幾耐，又好滿足也hehe~

和民既環境唔錯也，入左去都唔覺自己身處葵芳，因為間間入左去個樣都無分別，可以當自己響銅羅灣都得!

==========================================

嘩3年半啦~~~ 記得同Baby一齊左唔夠幾個月果時，仲一齊讀緊IVE架，有日同Baby企響沙田IVE裏面好似2樓既走廊到，望住Baby個男同學係空地果時，Baby話我知哩個男同學拍左拖3年幾4年啦，好耐也痴線架咁喎~ Baby話邊可能拍咁耐架，好悶個喎~~~ 嘩但係家下我同Baby正正向住3年幾4年進發，下咁我地咪好悶羅?~...

驚驚地潻，拍得拖咁耐，真係一次大關口都未出現過，唔通第4年會有一個關口? 嘩唔好講笑，我感覺到好似有個大考驗黎緊，驚驚地潻....

不過我自信我既諗法好o岩既，就係要keep住畀Baby有種被緊張被重視既感覺，不過Baby對「緊張」同「重視」既要求係隨時間而增加，我都要繼續努力畀Baby有種被愛既感覺先得啦，點做好呢? hehe我諗到一個喎，雖然好簡單，不過應該有效既~ hehehe~~~~